1 Samuel 2

Umkhuleko kaHana

1UHana wasekhuleka esithi: “Inhliziyo yami iyathokoza kuJehova; kuJehova uphondo lwami luphakeme. Umlomo wami uyaziklolodela izitha zami, ngoba ngiyajabula ngokukhulula kwakho.

2“Kakho ongcwele njengoJehova; kakho omunye ngaphandle kwakho; akulaDwala elinjengoNkulunkulu wethu.

3“Musa ukuba ukhuluma ngokuzigqaja kanje loba uyekele umlomo wakho ukhuluma ukuzikhukhumeza okunje, ngoba uJehova unguNkulunkulu owaziyo, njalo izenzo zilinganiswa nguye.

4“Amadandili amabutho ephukile, kodwa labo abakhulekayo bahlonyiswe ngamandla.

5“Labo ababesuthi baziqatshisa ngokudla, kodwa labo ababelambile kabalambi futhi. Lowo owayeyinyumbakazi usezele abantwana abayisikhombisa, kodwa lowo owayelamadodana amanengi uyacikizeka.

6“UJehova uletha ukufa njalo enze ukuphila, wehlisela phansi engcwabeni njalo avuse.

7UJehova uthumela ubuyanga kanye lenotho; uyathobekisa njalo uyaphakamisa.

8Uvusa abayanga ethulini aphakamise abaswelayo esilotheni; abahlalise lamakhosana. Enze bathole isihlalo sodumo sibe yilifa labo. “Ngokuba izisekelo zomhlaba ngezikaJehova; umise umhlaba phezu kwazo.

9Uzalondoloza izinyawo zabangcwele bakhe, kodwa ababi bazathuliselwa emnyameni. “Akusikho ngamandla ukuthi umuntu ehlule;

10labo abaphikisa uJehova bazaphahlazwa. Uzaduma amelane labo esezulwini; uJehova uzakwahlulela imikhawulo yomhlaba. “Uzayinika amandla inkosi yakhe aphakamise lophondo logcotshiweyo wakhe.”

11Emva kwalokho u-Elikhana wabuyela ekhaya eRama, kodwa umfana wakhonza phambi kukaJehova ngaphansi kuka-Eli umphristi.

Amadodana ka-Eli axhwalileyo

12Amadodana ka-Eli ayengabantu abaxhwalileyo, ayengamnanzi uJehova.

13Kwakungumkhuba wabaphristi labantu ukuthi kokuphela nxa loba ngubani enikele umhlatshelo, njalo lapho inyama isaphekwa, inceku yomphristi yayisiza iphethe ifologwe elembaxa ezintathu. 14Yayihlaba ngayo epaneni loba egedleleni loba ebhodweni kumbe embizeni, umphristi abe esezithathela loba kuyini okuphume lefologwe. Le yiyo indlela abaphatha ngayo bonke aba-Israyeli abafika eShilo. 15Kodwa lalapho amahwahwa engakatshi, inceku yomphristi yayisiya emuntwini onikelayo ithi, “Nika umphristi inyama yokosa; kasoze ayamukele kuwe inyama ephekiweyo, kodwa eluhlaza kuphela.”

16Lapho umuntu ethe kuyo, “Yekela amahwahwa aqale atshe, ube usuthathake lokho okufunayo,” inceku yayiphendula ithi, “Hatshi, ngiqhubela yona khathesi; uma ungenzi njalo, ngizayihluthuna ngamandla.”

17Lesisono samajaha sasisikhulu kakhulu emehlweni kaJehova, ngoba babephatha umnikelo kaJehova ngokwedelela.

18Kodwa uSamuyeli wayekhonza phambi kukaJehova – umfana egqoka isambatho samahlombe selineni. 19Minyaka yonke unina wayemenzela ingubo encane ayise kuye lapho esiya khonale lomkakhe ukuyanikela umhlatshelo weminyaka yonke.

20U-Eli wayebusisa u-Elikhana lomkakhe, esithi, “Sengathi uJehova angalipha abantwana ngalo owesifazana ukuba bathathe isikhundla salowo amkhulekelayo wasemnika uJehova.” Emva kwalokho babebuyela ekhaya.

21UJehova waba lomusa kuHana; wakhulelwa wazala amadodana amathathu lamadodakazi amabili. Kusenjalo, umfana uSamuyeli wakhula phambi kukaJehova.

22Ngalesosikhathi u-Eli, owayesemdala kakhulu, wezwa ngakho konke okwakusenziwa ngamadodana akhe ku-Israyeli wonke kanye lokuthi ayelala njani labesifazana ababesebenza esangweni leThente lokuHlanganela. 23Ngakho wathi kuwo, “Kungani lisenza izinto ezinje na? Ngizizwa ngabantu bonke lezizenzo zenu ezimbi. 24Hatshi, madodana ami; akusimbiko omuhle engiwuzwa usanda phakathi kwabantu bakaJehova. 25Nxa umuntu esona komunye umuntu, uNkulunkulu angammela kodwa uma umuntu esona kuJehova, ngubani ongamkhulumela na?” Kodwa amadodana akhe kawakulalelanga ukukhuza kukayise, ngoba kwakuyisifiso sikaJehova ukuba awabulale.

26Umfana uSamuyeli waqhubeka ekhula ngomzimba langokuthandeka kuJehova lasebantwini.

Isiphrofetho esibi ngendlu ka-Eli

27Ngalesosikhathi umuntu kaNkulunkulu wafika ku-Eli wathi kuye, “Nanku okutshiwo nguJehova ukuthi: ‘Kanje kangizibonakalisanga ngokubalulekileyo endlini kayihlo lapho babeseGibhithe ngaphansi kukaFaro na?

28Ngakhetha uyihlo phakathi kwezizwana zonke zako-Israyeli ukuba abe ngumphristi wami, ukuba aye e-alithareni lami, ukuba atshise impepha, lokuba agqoke isambatho samahlombe phambi kwami. Njalo nganika indlu kayihlo yonke iminikelo eyenziwa ngomlilo ngabako-Israyeli. 29Pho kungani useyisa imihlatshelo yami kanye leminikelo engayiphawulela indlu yami yokuhlala na? Kungani usazisa amadodana akho okudlula mina ngokuzikhuluphalisa lina ngokwenu ngezingxenye zekhethelo zeminikelo yonke eyenziwa ngabantu bako-Israyeli na?’

30“Ngakho-ke uJehova, uNkulunkulu kaIsrayeli, uthi, ‘Ngathembisa ukuthi indlu yakho lendlu kayihlo zizakhonza phambi kwami nini lanini.’ Kodwa khathesi uJehova uthi, ‘Akusenjalo kimi! Labo abangihloniphayo ngizabahlonipha, kodwa labo abangeyisayo bazakweyiswa. 31Isikhathi siyeza lapho engizaphungula khona amandla akho lamandla endlu kayihlo, ukuze kungabi lomuntu omdala kusendo lwakwenu 32njalo uzabona usizi lapho engihlala khona. Lanxa okuhle kuzakwenziwa ku-Israyeli, kwabosendo lwakho akuyikuba lomuntu omdala. 33Lowo lalowo wakini engingayikumsusa e-alithareni lami uzayekelwa nje ukuba afiphaze amehlo akho ngezinyembezi lokuba azwise inhliziyo yakho ubuhlungu, njalo yonke inzalo yakho izakufa kuyikhona isephakathi kwempilo.

34“Njalo okwenzakala emadodaneni akho amabili, uHofini loFinehasi, kuzakuba yisiboniso kuwe – bobabili bazakufa langa linye.

35Ngizazivusela umphristi othembekileyo ozakwenza mayelana lokusenhliziyweni yami lengqondweni yami. Ngizamisa indlu yakhe iqine, njalo uzakhonza phambi kogcotshiweyo wami kokuphela. 36Lapho-ke bonke abosendo lwakho abaseleyo bazakuza bakhothame kuye becela uhlamvu lwesiliva loqweqwe lwesinkwa njalo bakhalaze besithi, “Ake ungibeke kwesinye isikhundla sobuphristi ukuze ngithole ukudla ngindle.” ’ ”